Комеморација во чест на поетот, писател, преведувач и издавач Тихомир Јанчовски ќе се одржи утре во 18 часот на Филолошкиот факултет „Блаже Конески“ во Скопје. Јанчовски почина ненадејно на крајот на јануари. Имаше 58 години.
Тихомир Јанчовски (1967-2026) дипломирал општа и компаративна книжевност на Филолошкиот факултет при Универзитетот „Свети Кирил и Методиј“ во 1991 година, по што специјализирал во Будимпешта, на катедрата за Средновековни студии на Централноевропскиот универзитет. Во 2010 година магистрирал современа историја на УКИМ. Беше и професор, музичар, издавач и автор на повеќе од 30 книги, главно поезија, преводи и (поетски) романи. Избори од неговата поезија се преведувани и објавувани во различни литературни списанија, застапен е во голем број антологии, а четири од неговите книги се преведени на други јазици. Преведуван е на англиски, француски, словачки, хрватски, албански, босански, грчки, германски, српски, полски, грузиски, персиски и на италијански јазик.
Автор е на плејада поетски книги кои се високо ценети меѓу читателите: Обични зборови (1999), Два, (2002), Последно време (2005), Осама (2010), О, ти (2011) и други. Превел дваесетина дела и приредил неколку антологии.
Од 2013 до 2016 објавувал колумни во „Утрински весник“. Издал и книга колумни „Како ми скроија капа и други записи“ (2018). Во соработка со Бранислав Николов, Јанчовски го создава поетскиот перформанс „Волкот на љубовта“. Во 2025 година неговиот ракопис „Камен во водата“ беше награден со признанието „Караманов 2025“.
